MANDAUE CITY, CEBU- Gitaktak sa Office of the Ombudsman sa katungdanan si Mandaue City Mayor Jonas Cabungal Cortes human siya napamatud-ang sad-an sa grave misconduct tungod sa pagtugot sa padayong operasyon sa cement batching plant nga walay gikinahanglang business ug environmental permits.
Kini nga kaso ang gipasaka nila ni Ines Corbo Nacesario ug Julita Narte tungod sa pagtugot sa usa ka kompanya sa semento nga maka-operate sa siyudad nga walay saktong permit.
Ang nahisgutang kompanyakay mao ang SUPREA Phils. Development Corp. nga nahimutang sa Sitio San Jose 1, Circumferential Road, Barangay Labogon, dakbayan sa Mandaue nga nag-operate niadtong 2020 hangtud 2022.
Nasayran nga nag-operate ang maong kompanya sulod sa duha ka buwan nga walay business permit, sanitary permit, ug environmental compliance hinungdan sa hukom sa Ombudsman sa pagpataktak kang Cortes.
Napamatud-an nga “guilty” ang mayor sa kasong Grave Misconduct base sa dose ka pahina nga desisyon sa buhatan sa Ombudsman.
Kung kahinumduman, kasamtangang gisuspenso ang mayor tungod sa kasong giatubang usab kaniya sa illegal nga pagbutang sa usa ka Camilo Basaca Jr. isip OIC-Head sa City Social Welfare Services sa Mandaue City Government pipila na ka tuig ang nakalabay.
Nipagawas dayon og pamahayag si Cortes sa maong panghitabo nga matud pa niya gigamit sa iyang mga kaatbang sa politika ang ilang koneksyon sa administrasyon aron i-impeach siya.
