TALISAY CITY, CEBU- Nagpatuman og dinalian ug long-term security measures ang lokal nga kagamhanan sa Dakbayan sa Talisay aron mapanalipdan ang mga estudyante, magtutudlo, ug mga kampus batok sa posibleng hulga gikan sa gawas.
Matod ni Mayor Gerald Anthony “Samsam” Gullas Jr., nakig-alayon na ang City Government sa Philippine National Police (PNP) ug Department of Education (DepEd) aron masiguro ang hugot nga seguridad sa mga eskwelahan sa siyudad.
Kahinumduman nga gisuspinde ni Mayor Gullas ang klase sa Talisay City Elementary School ug Talisay City National High School niadtong Hulyo 6 human mialarma ang usa ka social media post gikan sa alyas “Zane Bacalso” nga nanghulga og pagpamusil sulod sa kampus.
Gawas sa pag-trace sa maong peke nga account, gipadala usab ang mga sakop sa SWAT ug lokal nga kapolisan aron magpatrolya sa mga eskwelahan.
Isip bahin sa dugang nga pagpangandam, sugdan sa LGU ang pagpataod og CCTV cameras sa mga tunghaan ug ipatuman ang paggamit sa “One Button Emergency App” aron mapadali ang pagtawag og tabang sa kapolisan kung adunay emerhensiya.
Gipatuman usab ang mas hugot nga security protocols sama sa mandatory nga pagkapkap ug inspeksyon sa mga bag, limitasyon sa pagsulod sa mga sakyanan, pinugsanay nga pagsul-ob og school ID, ug pagkuha og visitor gate pass.
Ubos sa Oplan Balik Eskwela framework, nagbutang usab ang kapolisan og Police Assistance Desks ug nagpahigayon og regular nga foot patrol sa mga dagkong barangay hub aron mapadayon ang kahapsay ug seguridad.
