CEBU CITY — Andam ang usa ka inilang tambalanan sa Sugbo nga makigpulong ngadto sa pamilya ni Cebu Provincial Governor Gwendolyn Garcia aron tubagon ang mga pangutana kabahin sa kamatayon sa mga igsuon niini.
Sa giluwatang pamahayag sa Chong Hua Hospital, nagkanayon kini nga andam nilang klarohon ang mga medical interventions nga gihatag ngadto nilang kanhi-Dumanjug mayor Nelson Garcia ug Barili mayor Marlon Garcia.
Kahinumdumang namatay ang duha ka mga kanhi mayor gumikan sa kakulian sa ilang panglawas apan nangaayo sila sa COVID-19 pandemic.
Kini maoy nagtukmod sa pamilyang Garcia aron modangop sa mga eksperto kabahin sa mga nahatag nga medical interventions ngadto sa managsuon.
Gikumpirmar usab sa Chong Hua Hospital nga pulos mga maayong espesyalista ang nag-atiman sa managsuong Nelson ug Marlon sukad nga nalandig kini.
Nasabtan sa mga namunuan sa maong tambalanan ang pagbangutan sa pamilya ug mipadangat kini og pahasubo.
Gihimug-atan sa maong tambalanan nga gibuhat nila ang tanan alang sa paghatag og maayong pag-atiman ug serbisyo ngadto sa ilang mga pasyente sulod na sa taas nga panahon. /gn
