Bisan paman sa nagkalapad nga AI nga naghatag og kawalay kaseguraduhan sa trabaho sa tawo tungod kay pwede na muhulip niini ang robot, mikatap ang usa ka video nga nagpakita sa mga trabahante sa usa ka tahi-anan sa India nga nagsoot og camera diha sa ilang ulo nga daw nga mga robot.
Makita ang tanang trabahante nga nag-operate og sewing machines nga adunay gibutang sa ilang ulo, kini mao ang head-mounted cameras.
Bisan walay news outlet nga nakakompirma niini, ang nag-unang teorya kabahin sa maong head-mounted cameras mao nga gigamit kini aron i-record ang lihok sa mga trabahante, aron magamit sa mga kompanya ang footage sa pag-train sa AI-powered robots nga sa ulahi mopuli kanila.
Sumala pa sa mga komento, sa maong video gipakita nga himuon ang mga tawo nga susama sa robot sa pagtrabaho og tudluan sa mga tawo ang mga robot unsaon pagtrabaho sama sa robot apan ang subo mao ang kaulahian tungod kay papahawaon ang tanang tawo ug ang mga robot na ang patrabahoon.
Tungod kay ang mga camera nagrekord gayud sa eksaktong makita sa trabahante — apil na ang lihok sa kamot, koordinasyon, ug paagi sa pagbuhat sa trabaho — makahimo kini og datos nga makat-unan sa mga makina.
