Gipanghingusgan karon sa Traffic Enforcement Agency of Mandaue (TEAM) ang ilang kampanya batok sa mga electric bikes (e-bikes) ug e-trikes nga nagbiyahe sa mga dagkong highway sa dakbayan samtang nagplano na usab sila og lokal nga ordinansa aron hingpit kining maregular.
Matod ni TEAM head Hyll Retuya, gipaspasan nila ang operasyon human namatikdan ang pagbalik sa maong mga sakyanan sa mga dagkong dalan, ilabi na kon wala ang mga enforcer, hinungdan nga kinahanglan na ang mas estrikto nga pagdili niini.
Gikan sa Enero hangtod sa Pebrero 12 karong tuiga, sobra na sa lima ka e-trikes ug e-bikes ang na-impound sa ilang buhatan diin ang mga malapason nag-atubang og multa nga moabot sa hapit P5,000 tungod sa kakuwang sa rehistro ug driver’s license.
Matod ni Retuya atol sa pakighinabi niini sa sakop sa mga tigbalita, dugay na kining gipatuman sa TEAM diha sa mga national highway aron masiguro ang kaluwasan sa dalan ug mapugngan ang dili kontroladong pagdaghan sa e-bikes nga makadugang sa kahuot sa trapiko.
Sa pagkakaron, nagpabilin nga luag ang TEAM sa mga feeder roads ug sulod sa mga barangay aron paghatag og konsiderasyon sa mga tiggamit niini.
Gitan-aw usab ni Retuya ang mulo sa mga rehistradong tricycle operators nga nagsunod sa prangkisa ug permits apan gidid-an usab sa pagbiyahe sa highway base sa direktiba sa DILG, gawas lang sa pipila ka dapit nga wala nay laing alternatibong ruta.
