CENTRAL VISAYAS-Nagkahinay na ang teroristang organisasyon o gitawag nga New People’s Army, mao kini ang gipanglantawang rason nga migamit na og social media platform ang mga terorista aron sa pag-recruit hilabi na sa mga kabatan-onan.
Mao kini ang gipaambit ni Lt. Col. Israel Galorio, ang tigpamaba sa Visayas Command atol sa pakighinabi sa Bombo Newsteam aron sa pagkuha sa ilang habig nunot sa dayag nga pagpang-recruit online.
Matud niini nga tungod kay nagkahinay na gayud ang ilang grupo ug sa mga sunod-sunod nga mga engkwentro ug pag-neutralize sa mga leader hinungdan nga posibleng mao kini ang nakaaghat kanila nga mogamit na sa plataporma.
Dugang pa niini nga paagi lang kini sa mga terorista aron ipakita nga naglihok pa ang ilang organisasyon, hilabi na nga nagkaduol ang election.
Hinungdan nga kusganong gikondenar sa armadong kusog sa kabisay-an ang paggamit sa mga NPA sa social media aron sa pagpanglimbong ug mang-manipula pinaagi sa mga bakak nga saad sa adbokasiya, panginabuhian, o pag-apil sa usa ka grupo nga makaangkon og katuyoan sa kinabuhi.
Gipasiugda sa Visayas Command nga ilegal ang maong mga kalihokan ug direktang mihulga sa kalinaw ug seguridad sa nasod tungod niini giawhag ang publiko nga magmabinantayon ug responsable sa paggamit sa mga digital platform, ug i-report dayon ang mga kadudahang kalihokan.
Kini nga pahimangno kabahin sa gihingusgan nga kampanya sa gobyerno sa pagsumpo sa terorismo ug pagpanalipod sa kaugmaon sa mga kabatan-onan.
