Napalgang patay sa atubangan sa computer ang usa ka teenager sa Thailand gumikan sa pagkagumon sa computer games.
Giila ang maong biktima nga si Piyawat Harikum, 17 anyos ug residente sa Udon Thani.
Gisaysay sa ginikanan ni Piyawat nga magduwa ang anak entero adlaw og mga online games.
Matud niini nga kayang makaduwa ang maong teenager sa atubangan sa computer tibuok gabii ug inig abot sa adlawan, sirad-an niya ang bintana ug kurtina aron ipadayon.
Hangtud nga gihatdan na lang sa ginikanan og pagkaon sa kwarto ni Piyawat ug mihangyo nga mopahuway sa pagduwa.
Apan nagdumili ang anak ug nagpadayon na lang sa usa ka multiplayer battle games sa computer.
Sa nakalabay nga mga adlaw, nakit-an na lang sa amahan nga si Jaranwit nga wala nay kinabuhi ang anak sa kwarto niini atubangan sa computer.
Gisuway og revive ni Jaranwit, isip usa ka air force officer, ang iyang anak apan wala na siyay signs of life.
Base sa autopsy report sa mga medic ngadto sa patayng lawas sa teenager, nakit-an nila nga stroke ang hinungdan sa iyang kamatayon dala sa pagkagumon sa computer games.
Mipahimangno si Jaranwit sa tanang mga ginikanan nga dili pasagdaan ng ma-adik ang mga anak sa computer games.
Kahinumduman nga gilakip sa World Health Organization ang gaming addiction isip usa ka matang sa mental disorder.
