Gikabutyag ni Tingug Partylist Representative Jude Acidre, ug Member of the House Committee on Justice nga gikalipay niya ang hukom sa Senado kabahin sa pag-convene niini isip impeachment court, niadtong Lunes, Mayo 18, alang sa husay ni Vice President Sara Duterte.
Matod ni Acidre atol sa ekslusibong pakighinabi sa Bombo Radyo Cebu kaniya, isip usa ka kongresista, gikalipay niya kining lakang karon sa Senado gumikan kay hingpit nang nasugdan ang proseso sa impeachment complaint batok sa bise presidente.
Dugang niya, adunay higayon na usab ang prosecutor nga magpakita sa gipanghuptan nga ebedinsya, ug ingun man ang higayon nga matubag na ang tanang aligasyon nga gikalambigitan sa Bise Presidente.
Samtang, gikanayon usab ni Acidre nga dili niya buot nga magkabahin-bahin ang mga personalidad, ubos na sa kasamtangang pagdumala ni Senate President Alan Peter Cayetano sa impeachment complaint batok sa bise presidente, kay alang kaniya, ang proseso sa konstitusyon klaro, ang Kamara kinahanglan nga motuman sa mga katungdanan niini sa konstitusyon aron magsugod ug magtukod og probable cause para sa impeachment.
Dugang niya nga nagtudlo na usab sila og mga piskal alang sa kaso sa impeachment trial busa, gikabutyag niya nga mosalig lang sa matag senador kay buhaton usab nila ang ilahang mga katungdanan.
Sa katapusan, gipanghinaot ni Acidre nga sa maong impeachment trial, buot niini nga makabaton kini og fairness o patas nga husgado, usa ka bukas nga husay nga gikinahanglan sa konstitusyon.
Diin gitataw niini nga bisan paman nga nasayud siya nga ang matag indibidwal adunay tagsa-tagsa ka mga political loyalties, political persuasions, apan kung ang katawhan magpabiling nangilabot, nakisalmot, ug mopartisipar sa matag diskusyon, makatagamtam ra og hustisya sa katapusan.
