MANDAUE CITY-Gikanselar sa kagamhanang dakbayan sa Mandaue ang pagpatuman niini og total ban sa pagpamasahero sa e-bike nga ipatuman unta sa Traffic Enforcement Agency of Mandaue (TEAM) base sa anunsyo kagahapong adlawa sa Lunes, Disyembre 9, 2024.
Kini ang gitataw ni Mandaue City Councilor Jimmy Lumapas, ang chairman sa Committee on Transportation sa City Council nga matod pa nga ang desisyon kay tali sa konsiderasyon sa mga e-bike drivers ug mga commuters.
Imbes ipatuman ang total ban, iyang gipahayag nga i-regulate ang paggamit sa e-bikes.
Kagahapong adlawa sab gi-release sa TEAM ang mga na-impound nga e-bikes human midangop sa buhatan ni Mayor Glenn Bercede sa pagpangayo og rekonsiderasyon og gitugutan kini.
Ang total ban sa mga e-bikes, nga una nga gipahibalo kaniadtong Nobyembre 27, gituyo aron matubag ang nagpadayon nga mga kabalaka sa kaluwasan ug trapiko diin namatikdan sa TEAM nga daghang mga e-bikes ang wala marehistro ug ang ilang mga drayber kulang sa saktong lisensya.
Sa dili pa ipormal ang sugyot, ipahigayon ang mga tigom uban sa mga representante gikan sa Land Transportation Office, TEAM, ug lokal nga e-bike groups aron maseguro ang komprehensibo ug patas nga mga regulasyon.
