CEBU CITY-Giangkon ni Reynalda Moradas, usa ka traffic enforcer sa Cebu City Transportation Office, nga nangilkil kini og P1,000 sa iyahang dinakpan gumikan iya kining ibayad sa kuryente.
Kini ang iyahang tubag human nga nag-abut sila ni Marinell Reyes kinsa nga nidangop sa sibyaanan human nga ang usa ka traffic enforcer nangayo og P1,000 apan wala sila gi-isyuhan og citation ticket.
Ingon man nga wala kini gikalipay sa pangu sa CCTO nga si Raquel Arce ug iyang taktakon sa trabaho ang maong empleyado nga gihimug-atan ni Arce nga ang pagpangilkil usa ka kalapasan sa balaod sa usa ka empleyado sa gobyerno.
Gibutyag niini nga bisan og nangayo og pasaylo si Moradas, giingong iyaha sa gihapon kini nga taktakon gumikan kalapasan kini sa balaod sa usa ka government employee.
Gani, asoy ni Arce nga mag-agi pa og proseso si Moradas apan, kusganong girekomendar niini nga tangtangon kini sa iyang trabaho gumikan dili kini angayan nga i-tolerate.
Ug mi-awhag sa publiko nga ma-atlan sa mga badlungon nga traffic enforcers, nga modangop sa ilahang buhatan, ug iyahang gisiguro nga dili kini niya panalipdan.
