Nagpabilin sulod sa ilang mga panimalay ang mga residente sa Texas human matumba ang usa ka 18-wheeler nga truck nga nagkarga og kapin 50,000 ka libra sa mga putyokan, nga gibanabanang moabot sa kapin 2 milyones ka mga buyog.
Nahitabo ang insidente sa Mauriceville area sa dihang natumba ang truck atol sa pagliko niini, hinungdan sa pagkatibulaag sa daghang mga buyog sa kadalanan. Hinuon, wala maunsa ang driver, apan gilukop sa nagkatag nga mga buyog ang maong lugar.
Daling gitawag sa mga lokal ang beekeeper aron tigumon ug ibalhin ang mga buyog ngadto sa usa ka duol nga honey farm.
Gitambagan usab sa mga otoridad ang mga residente nga magpabiling sulod sa balay alang sa ilang kaluwasan samtang nagpadayon ang operasyon sa pagdakop sa mga buyog.
