Pagkabalda sa serbisyo ang resulta human nadasmag sa usa ka tindahan ug poste sa kuryente ang garbage truck sa Barangay San Nicolas Proper didto sa Brgy. Polog, Consolacion, sayo sa buntag niadtong Sabado, Pebrero 21.
Base sa report, padulong unta ang maong truck sa landfill sa Brgy. Polog aron molabay og basura sa dihang kalit kining nawad-an og preno. Sumala ni Barangay Captain Clifford Jude Niñal, dako ang posibilidad nga “nawad-an og hangin” ang air brake sa truck hinungdan nga wala na kini mokagat ug diretso nga mibangga sa usa ka tindahan ug mibali sa poste sa kuryente.
Tungod sa kusog nga impact, nakaangkon og mga bun-og ang driver sa truck ug daling gidala sa tambalanan para sa medikal nga atensyon. Mapasalamaton hinuon si Kapitan Niñal nga walay laing seryosong naangol o nakalas sa maong aksidente gawas sa ilang drayber.
Sa pagkakaron, nakig-alayon na ang barangay sa Visayan Electric (VECO) aron ayohon ang nabali nga poste ug ang mga nagbitay nga linya sa kuryente sa lugar. Gipaabot pa nga maugkat ang truck nga puno pa sa karga nga basura human maplastar ang mga wire sa kuryente.
Nanawagan na si Kapitan Niñal og dinaliang tabang gikan sa Department of Public Services (DPS) sa Cebu City Government aron dili mabalda ang koleksyon sa basura sa ilang barangay.
Dungan niini, nag-abiso ang kapitan sa iyang mga konstituwente nga dili lang una ipagawas ang ilang mga basura samtang gi-atiman pa ang naguba nga truck aron malikayan ang pagkatag sa hugaw sa kadalanan.
