CEBU CITY-Gipaambit ni Atty. Joey Daluz ang chairman sa Metro Cebu Water District nga adunay 120,000 cubic meters sa tubig ang gidugang sukad nga milingkod kini sa MCWD.
Mao kini ang agi’g pagpangandam sa buhatan sa El Nino nga matud niini sigurado nga adunay pag-ubos sa suplay sa tubig kon gani mag-agad lang sa kasamtangang naandan.
Diin, ang usa anaa sa Lusaran area nga gipun-an og 30,000 cubic meters nga gi-ablihan sa miaging tuig samtang adunay umaabot nga 25,000 cubic meters sa Mambaling nga matud niini usa ka Desalination Project ingon man ang anaa usab sa Opaw sa dakbayan sa Mandaue.
Gani, ang Lapu-Lapu City nga gigahinan og 15,000 cubic meters ug ang Cordova nga anaa sa 20,000 cubic meters nga mo-operate karong ikaduhang quarter ning tuiga.
Subay niini, mipadayag usab sa iyang kaamguhan ang opisyal nga dili masulbad sa MCWD ang kakuwang sa tubig sa Cebu gumikan ang problema anaa sa kakuwang sa imprastraktura arun maka-generate og tubig.
Asoy ni Daluz nga dili usab maka-provide ang MCWD gumikan kinahanglan kini og dakong pundo arun matukod.
Gani, misuway kini og dangop sa kongreso ug Congressman sa tibuok probinsya sa Sugbo apan, dili kini mahatagan og budget gumikan sa giingon nga usa kini ka Local Government-Owned and Controlled Corporations o kon LGOCC.
Ingon man nga kusganong gituohan ni Daluz nga ang tubig ikaduha sa ‘hangin’, hinungdan angayan lang kini nga hatagan og pundo.
