CEBU CITY- Gidayeg ang tulo ka tinun-an sa University of Cebu – Main Campus, College of Computer Studies human kini nimugna og Emergency Response Tracker aron masiguro ang transparency ug ipakita sa tinuod nga panahon kon asa nga mga lugar ang nakadawat na og hinabang.
Gipakita nila ni Vince Clave Igot, Ralph Adriane Dilao, ug Clint Alonzo ang ilang kahanas sa bag-ong teknolohiya taliwala sa mga nadawat nga pagsaway kabahin sa mga biktma sa 6.9 magnitude nga linog sa Northern Cebu nga giingong wala makadawat og mga hinabang.
Ang app kay nagtanyag og real-time nga mapping ug mga feature sa pagsuporta nga gidisenyo aron makonektar ang mga apektadong komunidad sa mga responders nga mas episyente, ingon man nga mamahimong i-pin ang ilang nahimutangan kon wala sila makadawat og tabang, samtang ang mga boluntaryo, LGUs, NGOs, ug charitable groups makasubay sa mga dapit nga angayan ang hatdan sa mga hinabang.
Samtang, ang Kagamhanan sa Probinsiya sa Sugbo nilusad usab sa susamang app aron mamonitor sa publiko ang pag-apod-apod sa hinabang online, uban ang mga update sa hinabang nga gihatag sa mga apektadong lugar.
Uban niini nga mga kabag-ohan, ang duha nga mga plataporma mamahimong magtinabangay sa usa’g usa sa pagpalig-on sa pagtubag sa katalagman-dili lamang alang sa karon nga linog apan alang usab sa umaabot nga mga kalamidad.
