CEBU CITY – Naglatid og limitasyon matag adlaw ang Mactan Cebu International Airport (MCIA) alang sa mga unvaccinated o dili bakunado nga mga langyaw nga turista nga moabot dinhi sa Sugbo aron masiguro nga dili mapuno ang quarantine hotels diin kutob lang sa usa ka libo ka langyaw ang dawaton.
Gihimo ang maong lakang aron dili daling mapuno ang hotels sa Sugbo tungod sa mga turista nga kinahanglan nga ipaubos sa kwarentina.
Una na nga mipagawas og executive order si Cebu Governor Gwen Garcia kalabot sa mga lagda nga sundon sa mga international travelers.
Base sa lagda, tangtangon na ang pagkwarentina sa mga returning overseas Filipino (ROF) ug overseas Filipino workers (OFW) nga moabot sa Sugbo ingon man sa mga balikbayan ug langyaw nga turista.
Base sa EO , pangayoan og negatibo nga RT-PCR test ug ipaubos gihapon og swab test sa pag abot ang mga ROFs nga dili bakunado.
Samtang kadtong mga turista nga wala na magkinahanglan pa og visa sa pagduaw sa Pilipinas, gikinahanglan usab nga mopresentar og negatibong resulta sa RT-PCR test ug travel insurance aron dili na i-kwarentina.
Kadtong nag kinahanglan og visa gikinahanglan gihapon nga mopresentar sa RT-PCR test apan dili na magkwarentina.
