CEBU CITY- Nadawat ni incoming Cebu City Mayor Nestor Archival ang city seal gikan ni outgoing Mayor Raymond Alvin Garcia, duha ka oras sa dili pa siya opisyal nga manumpa alas 12:00 sa udto karong adlawa, Lunes, Hunyo 30, 2025.
Ang simbolikong turnover nagtimaan sa opisyal nga pagtapos sa pamunoan ni Garcia ug pormal nga pagsugod sa bag-ong administrasyon ni Archival.
Sa iyang katapusang adlaw, gipirmahan ni Garcia ang gi-update nga Comprehensive Zoning Ordinance, nga wala pa mausab sukad 1996.
Gibutyag usab niya nga ang siyudad mibilin og ₱12.1 bilyon nga pondo, $2.2 milyon nga dollar reserves, ug zero utang.
Lakip sa iyang mga nahimo sa usa ka tuig nga serbisyo mao ang pag-abli sa Super Health Center, padayon nga pagtukod sa Cebu City Medical Center, ug pagpalambu sa BRT ug Carbon Market projects.
Gipadayag usab ni Garcia ang iyang pagpasalamat human siya gipasidunggan sa Bureau of Local Government Finance ug gihatagan og plaque of recognition atol sa Central Visayas Maharlika Awards.
Gihatagan usab siya og pasidungog sa Sangguniang Panlungsod tungod sa iyang mga kontribusyon ug kalampusan isip presiding officer sa konseho.
Sa pamahayag ni Garcia, nagpasalamat siya sa katawhan ug misaar sa kooperasyon sa bag-ong administrasyon.
Bisan pa sa mga kasamok nga mitumaw bahin sa turnover, giluwatan ni Garcia nga andam ang tanang dokumento ug naandam ang mga department heads aron suportahan ang bag-ong liderato.
Gisugdan ni Garcia ang iyang serbisyo niadtong Hulyo 2024 human sa temporaryong paglingkod.
