CEBU CITY — Gipasakaan na sa NBI og kaso batok sa upat ka mga Chinese-nationals kinsang giingong nagbugaw human nga nasikop atol sa entrapment operation sa usa ka KTV bar sa Brgy. Agus, dakbayan sa Lapu-Lapu.
Miresulta kini sa pagka-rescue sa laing 34 ka mga babayeng Chinese-nationals diin, matud pa, gipatrabaho sila isip mga guest relations officer (GRO) sa maong establisimento.
Nasikop ang mga dinakpan nga silang Zeng Dan, Quan Yiqing, Xiuzhu Wei, Xiushen Wie pinasikad sa search warrant gikan sa Lapu-Lapu City RTC.
Matud ni Atty. Tomas Enrile, director sa NBI-CEVRO, nga gipanag-iya sa mga Tsino ang maong KTV bar ug exclusive lang kini alang sa mga Chinese-nationals.
Base sa pagpakigsusi sa mga undercover agents, kinahanglan pang mobayad ang matag customer og 35,000 pesos bugti sa mga sexual favors ngadto sa mga babayeng Chinese.
Gawas pa niini, mobayad usab ang customer og P6,000 isip renta sa exclusive VIP room aron maka-sing along kauban ang maong babaye.
Gibutyag ni Atty. Enrile nga gi-recruit daan ang na-rescue nga mga Chinese-nationals aron magtrabaho sa usa ka legal online gaming operation apan gipatrabaho hinuon sila isip GRO sa maong KTV bar pag-abot sa nasud.
Nag-atubang ang mga dinakpan og kasong kalapasan sa Republic Act 9206 o Anti-Trafficking of Persons Act.
Dugang pa ni Enrile nga palawman pa ang maong imbestigasyon aron masuta kung kinsa ang nagpaluyo sa maong establisimento.
Nakig-alayon na ang NBI sa Chinese Consular Office ug sa Bureau of Immigration alang sa musunod pang mga lakang subay na sa pagkasikop sa mga dinakpan nga Chinese-nationals.
