Patay ang upat ka sundalo samtang usa ang samaran human gi-ambush sa mga indibidwal nga gituohang miyembro sa Dawlah Islamiya–Maute Group (DI-MG) ang usa ka grupo sa Philippine Army samtang nagpahigayon og marketing activities sa Purok 1, Barangay Liningding, Munai, Lanao del Norte niadtong Biyernes sa buntag, Enero 23, 2026.
Sumala sa inisyal nga mga taho, nagsakay ang mga sundalo sa usa ka blue nga Toyota Avanza sa dihang giatake sila sa mga armadong suspek nga gituohang kaanib sa DI-MG.
Wala pa gipagawas sa otoridad ang mga identidad sa mga sundalo nga namatay ug sa usa nga samaran.
Gikondena sa kumander sa Philippine Army, si Lt. Gen. Antonio Nafarrete, ang iyang gitawag nga “makalilisang ug talawan” nga pag-atake sa Dawlah Islamiya–Maute Group nga mikutlo sa kinabuhi sa upat ka tropa sa gobyerno sa maong lugar.
Matod pa ni Nafarrete, ang mga sundalo nagpatuman og community outreach activities sa Barangay Liningding sa dihang gipusilan sila sa mga suspek mga alas 10 sa buntag.
Human sa insidente, gipahibalo ni Nafarrete nga gipakusog na sa Philippine Army ang mga operasyon batok sa nahibiling mga terorista sa lugar, sa hugot nga koordinasyon sa kapulisan, lokal nga pangagamhanan, ug mga kauban nga komunidad.
Dugang pa niya, nagpabiling “determinado ug dili mabungkag” ang Philippine Army sa ilahang misyon nga panalipdan ang katawhan ug masiguro ang kaluwasan sa tibuok nasud.
