Gipasakaan og kaso sa US Department of Justice ang kanhi Presidente sa Cuba nga si Raúl Castro sa Miami, Florida.
Diin gawas sa kanhi president, duna pa’y lima ang gipasakaan og kaso nga “conspiracy” sa pagpatay sa mga lungsuranon sa US, upat ka ihap sa pagpatay ug duha ka ihap sa pagguba sa mga eroplano.
Busa, ang kanhi presidente ug ang militar sa Cuba giakusahan sa giingong pagpamusil sa duha ka civilian planes nga iya sa Cuban-American nga grupo nga “Brothers to the Rescue” niadtong 1996, nga nakapatay sa upat ka tawo, lakip ang tulo ka Amerikano, samtang anaa sa usa ka humanitarian mission sa Florida Straits.
Ang kanhi presidente, nga karon 94 anyos, nagsilbi nga pangulo sa armadong pwersa sa Cuba ug giingong naghatag sa mando sa pagpamusil sa mga eroplano.
Ang laing akusado sa kaso mao ang fighter pilot.
Gikondenar sa kasamtangang Presidente sa Cuba nga si Miguel Díaz-Canel ug sa iyang Foreign Ministry ang lakang. Gitawag nila kini nga usa ka “political maniobra.”
Giinsistir sa Cuba nga ang akusasyon ilegal. Giingon niini nga ang pagpahagsa sa mga eroplano kay pagdepensa sa kaugalingon tungod kay giisip niini ang grupong Brothers to the Rescue nga mga “terorista.” Nagtuo kini nga gigamit kini sa administrasyon ni Presidente Donald Trump sa Estados Unidos isip pasangil alang sa dugang nga agresyon sa militar batok sa mga pagdili niini.
Ang lakang sa Estados Unidos nahitabo taliwala sa nagkakusog nga kampanya sa administrasyong Trump aron palagpoton ang unom ka dekada nga rehimeng komunista sa Cuba.
