Gipahibalo sa Embahada sa Estados Unidos sa Pilipinas nga nagpondo ang Estados Unidos sa usa ka bag-ong maritime monitoring center sa Palawan nga mokolekta og real-time nga mga report gikan sa mga Pilipinong mangingisda bahin sa ilegal nga pagpangisda ug mga kadudahang kalihokan sa mga barko.
Ang pasilidad, nga nailhang Community Illegal, Unreported and Unregulated Fishing Reporting Center, giablihan niadtong Hulyo 30 sa pakigtambayayong sa Palawan Council for Sustainable Development.
Sumala sa US Embassy, gisangkapan ang pasilidad og Starlink satellite internet ug EarthRanger data software.
Kini mokolekta og real-time nga mga report gikan sa lokal nga mga mangingisda bahin sa gidudahang ilegal nga pagpangisda, mga kalihokan sa mga barko ug uban pang ilegal nga kalihokan, nga ipadala ngadto sa Bureau of Fisheries and Aquatic Resources (BFAR), National Maritime Center ug Provincial Government of Palawan.
Ang sentro gidumala ubos sa Fish Right Program, nga naka-focus sa maritime domain awareness ug pagpalig-on sa estratehikong presensya sa Estados Unidos sa dagatnon nga mga kahinguhaan sa West Philippine Sea.
Sumala sa opisyal sa embahada sa Estados Unidos nga si Taylor Fincher, ang pagsulbad sa ilegal nga pangisda ug mga may kalabutan nga kabalaka sa kadagatan usa ka importante nga “area of cooperation” tali sa Estados Unidos ug Pilipinas.
