Gipahibalo ni US Secretary of State Marco Rubio nga makig-alyansa ug mobalik ang Estados Unidos sa global vaccine alliance nga Gavi, taliwala sa nagpadayon nga pag-ulbo sa sakit nga Ebola sa daghang mga nasod sa Africa.
Gisultihan ni Rubio ang Senate Foreign Relations Committee nga nakab-ot ang maong desisyon pipila ka semana ang milabay, human hingpit nga gibawi sa administrasyong Trump ang pondo alang sa Gavi sa miaging tuig.
Ang Gavi usa ka organisasyon nga nagtabang sa labing kabos nga mga nasod sa kalibutan sa pagpalit og mga bakuna aron mapanalipdan ang mga kabataan batok sa mga makamatay nga sakit sama sa tipdas ug diphtheria, dungan sa ilang pagtubag sa mga outbreak sama sa Ebola.
Kahinumduman nga si US Health Secretary Robert F. Kennedy Jr., kinsa nailang dugay nang nagduhaduha sa kaepektibo sa bakuna, niingon niadtong Hunyo nga dili na mopondo ang US sa maong grupo nga nagkantidad og $300 milyones matag tuig.
Giingon ni Kennedy nga wala matod pa naghatag og importansya ang organisasyon sa kaluwasan sa publiko, apan wala kini nagpresentar og bisan unsang ebidensya aron pamatud-an ang iyang alegasyon.
