CEBU CITY-Usa ka insidente sa usa ka kan-anan sa usa ka mall sa Sugbo nakaani og lain-laing reaksyon sa mga netizen human gipabarog sa usa ka kustomer ang waiter sulod sa kapin duha ka oras.
Ang hinungdan sa insidente kay mahitungod “Sir” ang natawag sa waiter sa maong kustomer.
Subay sa post sa netizen nga si John Calderon diin saksi sa nahitabo nga insidente pasado alas 4 sa hapon niadtong Dominggo, Hulyo 21.
Una niyang namatikdan ang customer nga giila nga si Jude Bacalso ug ang waiter nga nagbarog didto nga nag-estoryahay.
Wala niya kini panumbalinga sa una, apan paglabay sa duha ka oras, mga alas sais sa gabii, nakita gihapon niya ang waiter sa samang posisyon.
Misulod sa eksena si John og nangutana kang Jude kon siya ba ang tag-iya sa restaurant.
Mitubag si Jude nga morag nagpahimangno, “Pangutan-a siya kon unsay nahitabo” diin iyang gitudlo ang waiter.
Dinhi nahibaw-an ni John nga gipabarog ang waiter mahitungod kay gitawag niya og “Sir.”
Dugang pa ni John nga walay mahimo ang ubang mga empleyado tungod kay duol ra kuno si Jude sa tag-iya sa maong restaurant.
Kon wala pa siya nanghilabot, dili unta makagawas ang waiter sa maong eksena.
Sa iyang post, gipadayag ni John ang iyang pagkadismaya sa gihimo ni Jude ilabi na nga pareho silang miyembro sa LGBTQ community.
Gisalikway usab ni John ang aksyon nga gibuhat ni Jude ingon an nga nagpaka-ulaw ra kini sa LGBTQ community.
Nakaani kini og daghang reaksiyon habig dili sa mahuyang apan sa waiter nga gidaug-daug.
