Gipakaslan sa mayor sa San Pedro Huamelula, Oaxaca, Mexico ang usa ka buaya isip kabahin sa 200 ka tuig na nga tradisyonal nga ritwal.
Giisip kini nga usa ka talagsaon ug makalingaw nga kasal ang nasaksihan diin ang mayor nga si Daniel Gutierrez, maoy nibida.
Instant bride ang peg sa buwaya human kini gisul-oban og puti nga sinina sama sa usa ka kaslonon, gihalokan mismo sa mayor atol sa seremonyang gipahigayon uban sa musika, sayaw, ug pagselebrar sa lokal nga komunidad.
Kini nga kasal simbolo sa panaghiusa sa tawo ug kinaiyahan, ug gisubli kada tuig isip pag-ampo sa maayong ani, kalinaw, ug panaghiusa tali sa mga tawo ug sa espiritu sa mga mananap ug kalikupan.
Ingon man nga ang buwaya giisip nga “prinsesa” sa mga katigulangan sa lumad nga komunidad, ug ang kasal nagrepresentar sa panaghiusa sa mga grupo nga lumulupyo sa rehiyon.
Ang mga lokal ug turista sama nagpundok aron masaksihan ang makalilisang ug makalingaw nga seremonya, nga nagpakita sa kalalom sa tradisyon sa Oaxaca, ug sa ilang pagtahod sa kalikupan ug sa espiritu sa kinabuhi.
