Gipaambit ni Sports Broadcaster & Analyst coach Beaujing Acot ang iyang giingong “sama sa salida” nga kasinatian sa usa ka Philippine Airlines (PAL) nga biyahe gikan sa Dumaguete paingon sa Manila, nga napugos sa paghimo og emergency landing sa Iloilo International Airport mga alas 4:30 sa hapon niadtong Abril 19, 2026.
Sumala ni Acot, ang ubang mga pasahero nakasinati og kalisud sa pagginhawa hinungdan nga gipaubos ang mga oxygen mask alang sa mga naapektuhan.
Dugang usab niini nga daw adunay problema sa bentilasyon sa eroplano sa wala pa kini molupad.
Ang biyahe nga PAL PR 2544, gikataho nga nakasinati og kakulang sa suplay sa oxygen sulod sa cabin human nakaabot sa cruising altitude nga 32,000 feet.
Tungod sa sitwasyon, ang piloto nakahukom dayon nga ibalhin ang ruta ug mohimo og emergency landing sa Iloilo aron masiguro ang kaluwasan sa mga pasahero ug tripulante.
