CEBU CITY- Gikumpirmar sa Negros Oriental Provincial Office nga miyembro sa New People’s Army ang usa sa mga suspek sa pagsunog patay ni Philippine AirForce Staff Sgt. Mark Herbert Oberes.
Matud ni Negros Oriental Provincial Police Office director Police Senior Supt. Edwin Portento nga basi sa ilang gihimo nga background investigation, nasuta nga ang usa sa mga suspek nga si Tomas Isugan, usa ka miyembro sa NPA ug nasikop na kini unom na katuig ang milabay apan gipagawas lang gumikan nga usa paman kini ka menor de edad.
Dugang pa niini nga lumad nga taga Guihulngan City Negros Oriental si Isugan.
Sa pagkakaron, padayun pa gihapon ang manhunt operation sa mga otoridad ni Isugan ug sa 3 pa niini ka mga kaubanan lakip na ang inahan ni Resamarie Cabanog nga si Edna Cabanog.
Una na nga gipasakahan ug kaso ang manag-uyab nga sila si Resamarie Cabanog ug Engr. Joshua Garcian. Samtang ang upat ka mga nahisgutang suspek gikatakda usab nga pasakahan ug kaso sa adlawng Lunes.
Padayun usab ang monitoring sa PNP ug AFP sa presensya sa NPA sa probinsya sa Sugbo gumikan sa pagkalambigit sa maong mga miyembro sa maong krimen.
