CEBU – Gibutyag ni Hotel Resort and Restaurant Association of Cebu (HRRAC) President Alfred Reyes nga epektibo na sa Hunyo 16 ning kasamtangan nga tuig ang pagpatuman sa pagsaka sa presyo sa mga hotel rooms nga naghatag ug quarantine o isolation facilities alang sa mga nangabot nga Overseas Filipinos ug sa mga Overseas Filipino Workers.
Kini human nga gitugotan na sa gobyerno ang maong lakang diin mokabat sa P2,500 ang increase alang sa mga five star hotel samtang P2,000 alang sa mga three star hotel.
Matud ni Reyes nga sukad sa P1,400 nga rate niadtong nakalabay’ng tuig karon lang nipausbaw usab ang mga hotels nga nagtanyag ug ‘multiple use’ ning panahon sa pandemya.
Sa datos sa HRRAC anaa sa 3,600 ka mga hotel ug laing walo pa ang nag-apply alang sa ‘multiple use’.
Gibutyag niini nga istrikto ang monitoring sa matag hotel nga adunay quarantine facilities diin dili kini makagawas-gawas hangtod nga wala pa ang negatibong resulta sa swab test.
Samtang gihimug-atan usab ni Reyes nga igo lang mosunod ang HRRAC sa bisan unsa man nga palisiya ang ipatuman sa gobyerno.
