Miabot sa P18.49 trilyon ang kinatibuk-ang utang sa gobyerno sa Pilipinas sa katapusan sa Marso 2026, sumala sa Bureau of the Treasury (BTr), nga nagpakita og pagtaas kon itandi sa miaging bulan ug sa miaging tuig.
Matod sa BTr, misaka ang utang og P328.43 bilyon o 1.81% gikan sa P18.16 trilyon niadtong Pebrero, ug mas taas og P1.81 trilyon o 10.81% kon itandi sa P16.68 trilyon sa samang bulan sa miaging tuig.
Giingon nga ang pagtaas tungod sa paghuyang sa piso batok sa dolyar, nga nakadugang og halos P299.5 bilyon sa bili sa utang nga denominasyon sa langyaw nga kwarta, dugang sa net issuance sa government securities.
Sa kinatibuk-an, 67.8% o P12.53 trilyon sa utang gikan sa domestic borrowing, samtang 32.2% o P5.95 trilyon gikan sa foreign debt.
Nisaka ang utang sa sulod sa nasud og 0.44% tungod sa net issuance nga P46.72 bilyon, samtang ang utang sa gawas sa nasud misaka og 4.81% tungod sa epekto sa depreciation sa piso.
Ang piso nisira sa P60.748 kada dolyar niadtong Marso 31, mas huyang kumpara sa P57.665 niadtong Pebrero 27, nga nakaapekto sa bili sa foreign-denominated debt.
Samtang, ang garantisadong obligasyon sa gobyerno miabot sa P381.41 bilyon, nga misaka usab tungod sa epekto sa pagkunhod sa bili sa piso.
Base sa Budget of Expenditures and Sources of Financing (BESF) 2026, gilauman nga moabot pa sa P19.06 trilyon ang utang sa katapusan sa tuig.
Ubos sa Medium-Term Fiscal Framework 2022–2030, target sa gobyerno nga ipaubos ang debt-to-GDP ratio ngadto sa 58% sa 2030 gikan sa kasamtangang 63.2%, nga mao ang pinakataas sa halos duha ka dekada.
Gilauman nga mopagawas pa og dugang update ang mga economic managers kalabot sa estado sa utang sa nasud.
