Dili makatambong si Bise Presidente Sara Duterte sa ikaupat nga State of the Nation Address (SONA) ni Presidente Ferdinand Marcos Jr.
Matud ni House Secretary General Reginald Velasco nga nakadawat sila og suwat gikan sa Office of the Vice President ug gibalibaran ang imbitasyon.
Dugang pa ni Velasco nga sa 200 ka dinapit, si Duterte lang ang ni-atras sa iyang imbitasyon alang sa SONA.
Kahinumdoman nga sa miaging tuig, wala makatambong ang bise presidente human sa iyang pagluwat sa gabinete ni Presidente Marcos.
Isip kabahin sa protocol, nagpadala usab og imbitasyon si Velasco kang kanhi presidente Rodrigo Duterte sa iyang panimalay sa Davao City.
Sa pikas bahin, gimanduan sa Office of the Ombudsman si Bise Presidente Sara Duterte ug siyam ka opisyal sa DepEd ug Office of the Vice President (OVP) sa pagsumiter sa ilang mga tubag sa reklamo kalabot sa giingong sayop nga paggamit sa confidential funds.
Diin ang mga respondents adunay 10 ka adlaw gikan sa petsa sa pagkadawat sa mando sa pagsumiter sa usa ka counter-affidavit, ingon man sa mga pahayag sa saksi ug uban pang mga dokumento nga nagsuporta.
Nipasidaan na usab ang Ombudsman nga ang kapakyas sa pagsumiter sulod sa gitakdang panahon makonsiderar nga waiver sa katungod sa pagpresentar og ebidensya, ug magpadayon ang preliminary investigation, ug ang bisan unsang motion to dismiss o motion for bill of particulars dili usab pagadawaton.
