Mipadayag si Vice President Sara Duterte nga wala siya malipay sa iyang pagbalik sa The Hague, diin gibilanggo ang iyang amahan nga si kanhi Pangulong Rodrigo Duterte.
Bisan pa niini, nagpasalamat siya sa tanang mitambong sa selebrasyon sa adlawng natawhan sa iyahang amahan sa Malieveld Park sa The Hague, Netherlands.
Gikompirma usab niya nga maayo ang kahimtang sa panglawas sa iyang amahan ug miingon nga nag-ampo siya kada adlaw nga mabalik kini sa Pilipinas.
Sa laing bahin, mipadayag si Duterte sa iyang paglaum alang sa 2028 presidential elections ug gikompirma ang iyang tinguha sa pagdagan niini.
Sa usa ka interbyu sa The Hague niadtong Lunes, miingon siya nga giisip na niya ang iyang kaugalingon isip usa ka “presumptive candidate” human sa iyang pagpahibalo sa plano sa pagdagan sa pagkapresidente.
Gisubli niya nga andam siya modagan ug giingon nga klaro na niya ang iyang intensyon sukad pa sa sayo ning tuiga.
Niadtong Pebrero, pormal niyang gipahibalo ang iyang plano sa 2028 national elections, nga nagbutang kaniya isip usa sa mga nanguna nga posibleng kandidato.
Ang iyang pahayag miabot sa tunga-tunga sa usa ka tensiyonado nga political environment, nga padayon nga gihulma sa mga debate ug nag-usab-usab nga alyansa padulong sa 2028.
