Manguna si Pinoy gymnast Carlos Yulo sa Philippine team nga makigtigi sa 2026 FIG World Artistic Gymnastics Championships sa Rotterdam, Netherlands, nga gikatakdang ipahigayon gikan Oktubre 17 hangtod 25.
Mouban kaniya ang iyang igsoon nga si Karl Eldrew Yulo sa maong torneyo.
Ang duha makigtigi sa men’s individual all-around event, samtang moapil usab sa ilang tagsa-tagsa ka mga event ang ubang Filipino gymnasts nga sila si Juancho Miguel Besana ug Haylee Garcia.
Kahinumdoman nga nakadaog si Carlos Yulo og duha ka gold medal sa floor exercise ug vault sa bag-o lang natapos nga Asian Games sa Aichi-Nagoya, Japan.
Sa pagkakaron, nagbansay-bansay ang Philippine team sa Antibes, France, isip pagpangandam alang sa maong torneyo.
Gibutyag ni Carlos nga kabahin sa iyang pagpangandam alang sa World Championships ang iyang pag-apil sa Asian Games.
Gipahayag usab niya ang iyang katagbawan nga hapit na makompleto ang team alang sa ilang training camp.
Samtang, nagpahayag og pagsalig si Karl Eldrew Yulo nga makasulod sa podium human siya nakadaog og bronze medal sa Asian Games.
