Nagpasaka og petisyon si Bise Presidente Sara Duterte sa Korte Suprema aron kwestyonon ang tulo ka ihap sa kasong grave threat nga gipasaka batok kaniya sa Department of Justice (DOJ).
Pinaagi sa usa ka Petition for Certiorari and Prohibition nga adunay aplikasyon alang sa Temporary Restraining Order (TRO), gihangyo sa Bise Presidente sa Kataas-taasang Hukuman nga ipawala’y-bisa ang resolusyon sa DOJ nga nagrekomenda nga pasakahan siya sa maong mga kaso.
Gawas niini, gipangayo usab ni Duterte nga ipawala ang legal nga epekto sa resolusyon sa Quezon City Regional Trial Court nga nagbasura sa iyang motion to quash, apil na ang warrant of arrest nga gipagawas batok kaniya.
Kauban usab sa iyang giduso sa Korte Suprema ang pagpaundang sa prosekusyon ug sa korte sa Quezon City sa paghimo og bisan unsang aksyon o lakang nga may kalabutan sa maong kaso.
Ipresentar sa petisyon ang mga pangutana ug ug sukaranang mga isyu mahitungod sa mga limitasyon sa procedural immunity sa usa ka naglingkod nga opisyal nga mahimong ipailalom sa impeachment, aron makakuha og klarong katin-awan gikan sa Korte.
Gisundan dayon kini sa kampo sa Bise Presidente pinaagi sa usa ka mosyon alang sa dinalian nga pagresolba sa gigunitang TRO, aron dili kini mahimong moot and academic sa dili pa moabot ang gitakdang arraignment ug pre-trial karong adlawa, Setyembre 11.
