CEBU CITY-Pasidunggan karong adlawa si Cebu City Jail Warden Renante Rubio isip “City Warden of the year”.
Ipahigayon ang awarding sa Kauluhan sa Camp Aguinaldo kung diin si Presidente Rodrigo Duterte mismo ang muhatag sa maong pasidungog.
Kini ang gikompirmar usab ni Rubio kung diin mapasalamaton kini ug giisip nga naswertehan ang Cebu City nga maoy napili.
Gani, mitataw ang warden nga ang maong kalampusan dili lamang iya apan dili kini mahimo kung dili tungod sa mga personnel sa Cebu City Jail nga nagbuhat sa ilang trabaho , pagtuman sa iyang mga mando ug misuporta sa ilang kawsa ilabina ang pagpakgang sa pagsulod sa iligal nga butang sa prisohan.
Usa usab sa gihimug-atan ni Rubio nga maoy rason nga nakadawat sila niining maong award mao ang ilang intervention nga Alcohol, Smoking, Substance Involvement Brief Intervention diin mipaubos sila og seminar sa Department of Health (DOH) para maminusan ang ihap sa priso sa maong pasilidad nunot na usab sa proseso sa drug test ug exams sa mga mi-apply sa Plea Bargaining Agreement nga dugay ug gamay ra usab ang slots.
