Wala pa nag-isyu hangtud karon ang Sandiganbayan Fifth Division og warrant of arrest batok kang Senador Jinggoy Estrada kalabot sa kasong plunder nga naglambigit sa giingong anomalous flood control projects.
Sumala ni Sandiganbayan Presiding Justice Geraldine Econg, aduna pa’y pending nga motion nga gisang-at sa kampo ni Estrada, busa wala pa nag-isyu og warrant ang korte.
Gihisgutan usab sa mahistrado ang urgent motion aron bawion ang pag-isyu og warrant of arrest nga gisang-at sa mga abogado ni Estrada niadtong Biyernes sa hapon sa Sandiganbayan Second ug Fifth Divisions.
Giingon usab ni Econg nga kung ang maong motion makaapekto sa aksyon sa korte, ang Fifth Division mahimong dili mag-isyu og warrant hangtod nga kini masulbad.
Ang kasong plunder giisip nga usa ka non-bailable offense. Kini nagpasabot nga kung ma-isyu na ang warrant of arrest, ang akusado mahimong mabilanggo dayon gawas kung ang petisyon alang sa piyansa ma-aprobahan samtang gidungog ang kaso.
Samtang, ang Sandiganbayan Second Division kaniadto nag-isyu og mga warrant of arrest batok kang Estrada ug kanhi Public Works Secretary Manuel Bonoan kalabot sa kaso sa flood control graft.
Si Estrada ug Bonoan gihatagan dayon og piyansa nga tag-P90,000 matag usa aron temporaryo silang makagawas.
Dugang nga gipasabot sa Presiding Justice nga ang ilang dibisyon naka-isyu sa warrant ug Hold Departure Order tungod kay nagsugod na ang deliberasyon sa kaso sa wala pa gisang-at ni Estrada ang iyang urgent motion.
Dugang niya nga ilang gihisgutan dayon kung adunay probable cause sa kaso human sa ilang deliberasyon.
