CEBU – Padayong naglihok ang yuta palibot sa Sitio Garahe, Barangay Busay sa dakbayan sa Sugbo human sa mga adlaw nga walay hunong nga pag-uwan.
Hinungdan nga ang Cebu City Government nihangyo sa nasudnong kagamhanan nga mangilabot ug tabangan sila sa paghimo sa gikinahanglang mga lakang.
Kini ang gikompirmar ni Harold Alcontin, hepe sa Cebu City Disaster Risk Reduction and Management Office (CCDRRMO), nga nangayo sila og tabang sa Mines and Geosciences Bureau sa Central Visayas (MGB-7) aron sutaon dili lang ang dapit sa Sitio Garahe nga nahugno, apan usab sa duol nga mga dapit.
Matod ni Alcontin nga naglaum sila nga ang MGB-7 makapagawas sa ilang mga nakaplagan ug rekomendasyon sulod niining semanaha.
Sa kasamtangan, gi-cordon na ang landslide site sa Sitio Garahe, Barangay Busay.
