MANDAUE CITY-Singgit karun sa mga residente sa Sitio Basabas, Barangay Tipolo, dakbayan sa Mandaue nga sila atubangon ug paminawon ni Mayor Jonas Cortes.
Gibutyag ni Ginalyn Tupas, ang vice president sa nahisgutang lugar, nga ilahang gikabalak-an karun nga mapahawa sila sa ilahang nahimutangan nga wala man lang gani sila’y kabalhinan.
Una niini, usa ka Marlyn Basubas ang giingung mi-angkun sa yuta nga ilaha karung gi-ugbukan sa ilahang mga panimalay ug gani sila gikoral ug naglisod na sila sa pag-agi.Kini ang butang nga gikwestyon sa mga residente sa naasuy nga lugar.
Dugang pa sa kabalaka sa mga residente ang giingung pagdala ug mga armado nga security sa nagpa-ilang tag-iya sa yuta kung diin alang kanila pagpang-harass ang maong lakang. Gitataw ni Tupas nga dili sila mangilog ug yuta apan giingung isturyahon lang sila ug tarong ug dili ipaagi sa pagpang-harass.
Sa nasayran sa mga reklamante, giingung paliton ni Mayor Cortes ang maong luna hinungdan nga sila papahawa-on sa nagpa-ilang tag-iya.
Giingung ang maong luna ang tukoran ug eskwelahan hinungdan nga paliton kini sa mayor. Gikural na usab matud pa sa nanangkon sa yuta ang ilang lugar gamit ang ‘barbed wire fence’ kung diin nangasamad na matud pa sila ilabina ang mga bata ug tiguwang tungod kay muhapa ug muhupo naman og muagi.
Gani misaad na ang giingong tag-iya nga si Basubas nga mubalik siya aron nga koralon og sin ang lugar.
Subay niini, tuyo unta sa mga residente nga ma-isturya si Mayor Cortes apan giingung sa ikatulo nga higayon wala gayud sila atubanga sa opisyal.
Padayong gikab-ot sa sibyaan ang habig sa hingtungdan kalabot niining maong reklamo/ alegasyon. Abli usab ang sibyaanan sa Bombo Radyo Cebu para ni Marilyn ug ni Mayor Cortes ug sa ubang hingtungdan para mupadayag sa ilang habig. (SBR)
