Nanumpa si Ukrainian President Volodymyr Zelensky nga mobalos human sa makamatay nga pag-atake sa mga drone sa Russia batok sa usa ka shopping center sa Kryvyi Rih, central Ukraine, nga nakapatay og labing menos 16 ka tawo.
Kapin 130 ka tawo ang nasamdan sa maong pag-atake, lakip ang mga bata, samtang padayon ang operasyon sa mga rescuer sa pagpangita sa mga tawo nga posibleng natanggong ilawom sa mga kaguba.
Gikondena ni Zelensky ang pag-atake ug misaad nga motubag ang Ukraine batok sa Russia.
Matod niya, ang maong pag-atake usa ka tinuyo ug makalilisang nga aksyon batok sa mga sibilyan.
Ang Kryvyi Rih mao ang lungsod nga natawhan ug gipuy-an kaniadto ni Zelensky.
Kanunay usab kini nga target sa mga pag-atake sa Russia sukad nagsugod ang gubat tali sa duha ka nasud.
Matod sa mga opisyal sa Ukraine, duha ka sunod-sunod nga pag-atake sa drone ang miigo sa shopping center.
Ang ikaduhang pag-atake nahitabo mga 30 minutos human sa una, samtang nagpadayon ang rescue operation, hinungdan nga gikondena kini isip usa ka gitawag nga “double-tap” strike.
Sa laing bahin, laing mga pag-atake sa Russia sa Ukraine sulod sa misunod nga 24 oras nakapatay usab og ubang mga sibilyan, samtang nagpadayon ang pag-escalate sa mga pag-atake sa duha ka kampo.
