CENTRAL VISAYAS- Mihimo ang Police Regional Office 7 sa agresibo ug intelligence-driven nga operasyon batok sa kriminalidad sa tibuok Central Visayas gikan Pebrero 8 hangtod 14, 2026.
Ang maong kampanya gipahigayon subay sa direktiba ni Police General Jose Melencio Nartatez Jr. nga palig-onon ang gubat kontra iligal nga droga, wanted persons, iligal nga sugal ug loose firearms.
Sa report nga gipagawas sa PRO7, mokabat sa ₱5,231,036.00 ang balor sa iligal nga droga nga nasakmit sulod lamang sa usa ka semana. Lakip niini ang 769.27 gramos nga gituohang shabu ug usa ka gramo sa marijuana.
Tungod niini, anaa sa 196 ka drug suspects ang nadakpan, apil ang unom ka high-value individuals ug 190 ka ubang drug personalities.
Sa manhunt operations, 12 ka Most Wanted Persons ang nasikop, duha sa regional level, pito sa provincial level, ug tulo sa municipal level.
Dugang pa, anaa sa 128 pa ka wanted persons ang nasikop sa nagkadaiyang lugar sa rehiyon.
Sa kampanya batok iligal nga sugal, 73 ka indibidwal ang nadakpan sa kalapasan sama sa number games, cara y cruz, card games ug iligal nga sabong. Nasakmit usab ang ₱11,660 nga gipustahan.
Samtang sa anti-loose firearms operations, 35 ka pusil ang narekober ug 25 ka persona ang nadakpan tungod sa paglapas sa balaod sa armas.
Gidayeg ni PRO7 Regional Director PBGEN Redrico A. Maranan ang mga operating units sa ilang dedikasyon ug propesyonalismo sa pagpatuman sa balaod.
Matud pa sa PRO7, magpadayon ang ilang walay kahadlok ug walay pili nga kampanya aron masiguro ang kalinaw ug kahapsay sa tibuok Central Visayas.
