CEBU CITY-Padayon nga gi-imbestigaran karun sa kapulisan ang nahitabong pagpanulis sa mga korean national sulod sa high-end subdivision sa Barangay Banilad, dakbayan sa Sugbo.
Gibutyag ni Police Major Romeo Caacoy, Jr., ang hepe sa Mabolo Police Station, nga nakadawat sila og tawag, pasado alas 10 kagabii may kalabotan na sa giingong pagpanulis.
Matud pa, pag-abot nila sa area, naabtan pa nila ang mga suspek hinungdan nga ilahang gihangyo nga mosurindir na lang apan misangpot kini sa usa ka shootout.
Patay ang usa sa mga suspek, samtang nasikop ang laing duha pa nga pulos mga korean national.
Nasayran nga usa usab ka korean national ang biktima kinsang anaa na sa luwas nga kahimtang kauban ang duha ka mga katabang niini.
Atol sa maong insidente, naangol usab ang usa ka pulis hinungdan nga nalandig kini sa tambalanan apan anaa na usab karun sa luwas nga kahimtang.
Sa pagkakarun, gisuta pa sa kapulisan ang background sa mga suspek ug kung unsa ang koneksyon niini sa ilahang biktima nga usa usab ka korean national.
