CEBU CITY — Usa ang patay samtang 456 ang nadakpan sa tanang mga buybust operation nga napahigayon sa entero rehiyon 7 sa nakalabay nga buwan sa Nobyembre.
Sa giluwat nga report gikan sa Police Regional Office (PRO)-7 sukad Nobyembre 16 hangtud Disyembre 1 ning kasamtangang tuig, nakahipos ang mga kapulisan og kapin sa P48-million nga kantidad sa shabu, P13,600 usab ang balor sa mga nasakmit nga marijuana, ug nalutsan og 12 ka mga armas gikan sa mga dinakpan.
Sa 301 ka mga buybust operation sa rehiyon, nag-una ang Cebu City PNP diin nakahipos sila og dul-an sa P39-million nga balor sa shabu ug duha ka armas, ikaduha ang Bohol PNP nga adunay halos P4-million nga kantidad sa shabu ug duha ka armas, ug ikatulo usab ang Cebu Provincial Police Office diin nakasakmit sila og dul-an sa P3-million nga kantidad sa shabu.
Matud ni PRO-7 Director Brigadier General Valeriano de Leon nga seryoso ang ilang kampanya batok sa ginadiling drugas.
“In line with Pres. Duterte’s aggressive campaign to eradicate illegal drugs, we all aspire for a drug-free Philippines. But we have to do our job to help the President achieve this. Our fight against the drug menace in our country is a whole of nation approach. I mean, it is a concerted effort by the police and military, local government units, judicial, academe, non-government and people’s organizations, civic and private sectors, the church, every Filipino has a role to play to make our country drug-free,” sigon pa usab ni de Leon
Mibahad usab kini sa mga durugista nga mohunong na aron dili silotan sa balaud.
Gihimug-atan usab ni de Leon nga mahinungdanon ang kooperasyon sa katawhan alang sa kalampusan sa kampanya kontra ginadiling drugas.
