Mokabat sa 11 ka mga container vans ang adunay sulod nga gipalusot nga sigarilyo ang nasakmit sa hiniusang operasyon sa National Bureau of Investigation (NBI-7), Bureau of Customs ug Philippine Coast Guard (PCG-7) gahapong adlawa, Hunyo 24.
Una nga nasakmit sa mga otoridad ang 6 ka mga container vans sa sigarilyo sa usa ka bakanteng luna sa Brgy. Bacayan ning dakbayan sa Sugbo .
Laing 3 ka mga container van ang nasakmit sa usa ka pribadong pantalan sa Pier 7 ug ang duha ka container van ang anaa na sa kustodiya sa Philippine Coast Guard.
Gisubay sa mga imbestigador ang gigikanan sa shipment ug ang mga responsable, apil na ang posible nga koneksyon niini sa organisadong smuggling network.
Ang maong operasyon nagpakita sa padayong kampanya sa gobyerno batok sa illegal nga patigayon, nga nakaapekto sa kita sa gobyerno ug sa lehitimong negosyo. Ingon man nga gilauman nga mosunod ang angay nga kaso batok sa mga nalambigit human makompleto ang imbestigasyon.
Subay niini, mipadayag og kabalaka si Bacayan Brgy. Capt. Jenelyn Leyson sa pagkasakop sa ilegal nga kontrabando sa pekeng sigarilyo sa 8 ka mga container van sa iyang barangay.
Natingala usab siya kung ngano naabot sa iyang barangay ang maong mga container hilabi na nga gidili ang pag-agi sa mga prime movers sa Bacayan Bridge, busa nanawagan si Leyson sa iyang konstituwente nga magmatngon sa mga ilegal nga aktibidad sa ilang barangay aron kini malikayan ang susamang mga operasyon. | via Bombo Rexmond Omega
