MINGLANILLA CEBU-Nagpahigayon og sunod-sunod nga miting ang mga security personnel sa lungsod sa Minglanilla arun sa pagsiguro nga hingpit ang siguredad nga mahatag ngadto sa katawhan nga mosalmot sa ilang kalihokan.
Nasayran nga adunay 11 ka mga contingents ang magtigi nga gikan sa mga tunghaan sa Minglanilla ang moapil sa Sinulog sa Minglanilla 2024.
Sa pakighinabi sa Bombo Radyo Cebu News Team kang Patrolman Ryan John Derder, ang Assistant Operation sa PNCO Minglanilla Police Station gibutyag niini nga adunay 32 ka mga police personnel gikan sa Minglanilla police station ang gi-deploy ug wala pa kini labot sa augmented forces nga mokabat sa 18 ka mga personnel ug 10 ka mga covert security gikan sa probinsya.
Dugang usab ni Derder nga siguraduhon niini nga matag eskina adunay gibutang sa tropa arun malikayan ang bisan unsang matang sa kagubot.
Subay sa maong lakang nakig-alayon ang kapulisan sa Minglanilla Traffic Commission o kon MITCOM alang sa pag kontrolar sa dagan sa trapiko ugmang adlawa, Enero 28.
