-- ADVERTISEMENT --
CEBU – Duha ka tawo ang nasakmitan og P12.2 milyones nga kantidad sa gituohang shabu atol sa buy-bust operation sa Barangay Inayawan, dakbayan sa Sugbo sayo sa buntag niadtong Martes, Nobiyembre 22.
Giila ni Police Colonel Ireneo Dalogdog, hepe sa Cebu City Police Office ang mga suspetsado nga sila si Alexander Ponce, 31, molupyo sa Barangay Pardo, ug ang giingong kaipon niini nga si Jessie Abadiano, 31, taga Barangay Bulacao sa dakbayan sa Sugbo.
Nasakmit sa kapolisan gikan sa duha ka mga suspetsado ang mokabat sa 1.8 kilos nga kantidad sa gituohang shabu.
Dugang pa sa opisyal nga iya nang gimandoan ang iyang mga personnel nga hugot nga makig-alayon sa barangay sa ilang mga programa ug operasyon batok sa ilegal nga drugas.
