CEBU CITY- Gihangop ug giabi-abi sa hanay sa Cebu City Police Office (CCPO) ang dungog nga nadawat ni Police Colonel Ylanan human kini gipasidunggan sa Medalya ng Kagalingan, usa sa labing taas nga porma sa pag-ila sa kapulisan tungod sa talagsaong serbisyo.
Miusbaw ang garbo ug misaka ang moral sa tibuok kapulisan sa dakbayan, diin giisip ang maong pasidungog dili lang personal nga kalampusan sa ilang lider, kondili kolektibong kadaugan sa tibuok CCPO.
Sa pakighinabi sa Bombo Radyo, giingon ni Police Major Marvin S. Fegarido, hepe sa City Community Affairs and Development Unit (CCADU), nga bunga kini sa padayon ug disiplinadong implementasyon sa mga programa sa kalinaw ug kahapsay.
Matud niya, nasubay sa maayong pamaagi ang operational ug administrative accomplishments sa CCPO nga nakatampo sa pag-angkon sa maong prestihiyosong dungog.
Gipasabot usab ni Fegarido nga ang pasidungog nagpakita sa hugot nga dedikasyon sa kapulisan sa pag-alagad ug pagpanalipod sa katawhan, ilabi na sa pagpalig-on sa law enforcement ug public safety initiatives sa siyudad.
Bisan pa sa mga hagit sama sa padayon nga surveillance operations, kakulang sa resources, ug panginahanglan sa mas lig-on nga koordinasyon sa ubang ahensya, nagpabiling epektibo ang operasyon sa CCPO pinaagi sa pinalig-on nga liderato ug intel-driven nga pamaagi.
Gidugang pa nga ang mas organisado ug paspas nga pagresponde sa insidente usa sa mga bunga sa gipauswag nga sistema sa operasyon, nga nakapalig-on sa seguridad sa komunidad.
Gihatagan usab og gibug-aton ang kahinungdanon sa panaghiusa sa kapulisan, lokal nga gobyerno ug komunidad isip pundasyon sa padayon nga kalinaw ug kahapsay sa dakbayan.
Sa umaabot, misaad ang CCPO nga ipadayon ang ilang dedikasyon sa serbisyo publiko, ug himuon nga inspirasyon ang maong pasidungog sa mas pagpalambo pa sa ilang operasyon alang sa katawhan sa Cebu.
