CEBU CITY — Mag-atubang og tukmang kaso ang usa ka security guard human gituohang nakapusil og usa ka 12-anyos nga bata kinsang giingong nanguha og scrap metal sa usa ka construction site kagahapon sa Brgy. Mambaling, dakbayan sa Sugbo.
Giila ang suspek nga si Sgt. Marelle Belano, 29-anyos, ug nangempleyo sa Corps Philippines Security Agency.
Matud ni Police Staff Sgt. Renato Baldo sa Mambaling Police Station, nga samtang nagbantay si Belano sa usa ka construction site sa South Road Properties nasigpatan niini nga adunay grupo sa mga bata ang nanguha og mga scrap metals sa sulod.
Apan gilabayan ang gwardya og bato gikan sa mga bata bisan pa man og igo lang kining namadlong.
Hinungdan nga gibunlot sa gwardya ang armas de fuego dayon og salba apan wala kini nagdahum nga maigo ang bala sa maong menor de edad.
Gidala sa tambalanan ang maong bata apan gideklarar kining dead on arrival.
Apan nisurender pagkataud-taod ang maong gwardya ngadto sa mga sakop sa kapulisan.
Natanggong karon ang suspek sa prisuhan ug kasuhan og kalapasan sa RA 7610.
