CEBU CITY-Gipabakwit na ang di mominos 13 ka pamilya ug 57 ka indibidwal sa Sitio Cantipla, Barangay Sudlon II, dakbayan sa Sugbo tungod sa pagdahili sa yuta nga resulta sa makanunayon nga pag-ulan ganihang buntag Lunes, Hunyo 26, 2023.
Gitino ni Ramil Ayuman, Special Assistant to the Mayor’s office on Special Projects, nga ang kagamhanan sa dakbayan nang-apod-apod og bugas ug de lata ngadto sa mga biktima.
Sa pikas bahin, gihimong temporaryong evacuation center sa mga apektadong residente ang Cantipla Elementary School sa Barangay Tabunan.
Sa kasamtangan, ang mga residente gitambagan sa Cebu City Disaster Risk Reduction and Management Office (CCDRRMO), nga mobakwit tungod kay ang lugar dali nga mag-landslide.
Samtang, sa pikas bahin nag landslide usab sa Barangay Manipis, Talisay City.
Gitino sa pangu sa City of Talisay Traffic Operations and Development Authority nga si Joy Tumulak, nga kasamtangan, nagpadayun ang clearing operation ug daghang mga motorsiklo ang natanggong sa maong dapit, apan walay naangol.
Dugang pa niini, nga dili usa maagian ang dalan sa maong dapit tungod sa pagdahili sa yuta, ug alang usab sa kaluwasan sa katawhan.
