Nagpadayon ang pag-ulbo sa kapin upat ka tuig nga gubat tali sa Russia ug Ukraine human labing menos 13 ka tawo ang natala nga namatay sulod lang sa usa ka adlaw gumikan sa managlahing pagpangatake sa duha ka habig.
Sa Ukraine, gitarget sa Russia ang mga siyudad sa Zaporizhzhia, Odesa, Kharkiv, Sumy, Donetsk, ug Kryvyi Rih, nga miresulta sa kamatayon sa mga sibilyan ug kadaot sa mga building.
Sa laing bahin, gitaho sa Russia nga usa ka sibilyan ang namatay sa pagpamomba sa Ukraine sa rehiyon sa Belgorod.
Sumala sa mga taho, migamit ang Russia og mga guided bomb, missile strike, ug drone attack, nga hinungdan sa kaylap nga kadaot ug nakasamad og kapin sa 50 ka tawo.
Sa Odesa, usa ka missile strike ang miigo sa imprastraktura sa sibilyan, samtang sa rehiyon sa Sumy tulo ka tawo ang namatay sa usa ka aerial bomb attack.
Samtang, gitaho sa Moscow nga gitarget sa Ukraine ang daghang mga barkong pangkargamento sa Dagat sa Azov, nga gigamit sa pagdala sa mga produkto sa agrikultura ug mga suplay sa Crimea.
Gumikan niini, nagpagawas og seryosong pasidaan ang United Nations (UN) bahin sa nagkagrabe nga dagan sa maong gubat.
Sumala sa UN, ang Hunyo 2026 mao ang labing madugoon nga bulan alang sa mga sibilyan sukad pa niadtong Abril 2022.
