CEBU CITY – Gibalik na sa home care facility sa Mandaue City Municipal Social Welfare and Services Office ang 17 anyos nga akusado sa Christine Silawan Killing, ang grade 9 student nga gipanitan ang nawong ug gikuhaan pa og pipila ka internal organs.
Gikompirmar kini ni Atty. Vincent Isles, ang abogado sa akusado sa pakighinabi sa Bombo Radyo Cebu. Matud niini nga boluntaryo ug mi-commit sila nga ibalik sa home care facility ang iyang kliyente para sa custodial purposes ug ingon man para sa kaluwasan sa 17 anyos.
Samtang, karong adlawa usab mi -file sa ilang counter affidavit sa motion for reconsideration nga gipasaka sa NBI ang kampo ni Isles . Milaum kini nga dapigan sa gihapon sila sa prosecutor tungod pay para kaniya dili mamahimo nga sikopon ang iyang kliyente pinaagi sa inquest proceedings ug ipadayon nalang sa regular filing.
Wala usab matud pa na-pressure si Atty. Isles sa pag-apil ni Presidente Duterete sa issue. Sigon niini nga gihimo lamang niya ang iyang trabaho isip abogado. Sayod matud pa niini ang presidente sanglit usa man usab kini ka abogado.
Atty. Vincent Isles
Gitataw usab ni Isles nga sama sa pamilya nga Silawan gusto usab niini nga makuha ang hustisya para sa makalolooy nga biktimang si Christine apan dili makatarunganon nga patubagon sa krimen ang usa ka inosenteng tao.
