Kumpirmadong patay ang duha ka estudyante lakip ang giingong suspek sa insidente sa pagpamusil sa Ateneo de Zamboanga University (AdZU) High School Campus Martes sa buntag, Agosto 18.
Base sa inisyal nga report sa Police Regional Office 9 (PRO 9), ang biktima giila nga si Patrick Dylan Wee, Grade 10 nga estudyante nga nakit-ang patay sa ikaupat nga andana.
Ang giingong suspek giila usab nga si Mohammad Mael Jalani, Grade 9 nga estudyante, nga gikatahong nagpusil sa iyang kaugalingon sa ikalimang andana human sa insidente.
Sumala sa imbestigasyon, nahitabo ang pagpamusil alas 7:50 sa buntag ug walay klarong probokasyon.
Gikatahong gipusil sa suspek ang mga estudyante sulod sa usa ka classroom gamit ang pistola ug rifle.
Padayon ang imbestigasyon sa Regional Forensic Unit 9–Scene of the Crime Operations (RFU9-SOCO), kauban ang Zamboanga City Police Station 6 (ZCPS 6).
Naglunsad usab og parallel investigation ang CIDG Zamboanga City Field Office aron masuta ang background sa suspek, kung giunsa pagdala ang mga armas sa kampus, ang pagpanag-iya ug legalidad niini, ingon man kung adunay posibleng kapabayaan sa bahin sa administrasyon sa eskwelahan.
Samtang, nagpahayag og pahasubo ang City Government of Zamboanga sa pamilya sa mga biktima ug nakig-alayon na sa school administration, Zamboanga City Police Office (ZCPO), ug uban pang hingtungdang ahensya.
Gipasalig sa lokal nga gobyerno nga kontrolado na ang sitwasyon ug gipatuman na ang gikinahanglang mga security measures alang sa kaluwasan sa mga estudyante, magtutudlo, ug sa tibuok komunidad.
