Giaprobahan na sa Senado ang proposed 2025 national budget nga nagkantidad og P6.352 trilyon.
Diin adunay 18 ka boto ang nipabor ug walay supak ug usa ka abstention.
Una niini, gi-certify ni Presidente Ferdinand Marcos Jr., nga dinalian ang 2025 budget tungod kay gipasa kini sa Senado sa ikaduha ug ikatulo nga pagbasa sulod sa usa ka adlaw.
Gipasabot ni Senate Minority Leader Aquilino Pimentel III ang iyang pag-abstain tungod kay wala siya makauyon sa desisyon sa iyang kaubang magbabalaod.
Gidugang niini nga kinahanglan una nga adunay emerhensya tungod sa sertipikasyon sa presidente.
Samtang, ang kaubang minority senator nga si Senador Risa Hontiveros kay nipasabot nga pabor siya nga mapasar ang budget.
Hilabi na nga nadungagan ang budyet alang sa Inter-Agency Council against Trafficking, ug ang National Coordination Center Against Online Sexual Abuse and Exploitation of Children and Child Abuse and Exploitation Materials.
Gitangtang usab sa Senado ang P39.8 bilyones nga alokasyon alang sa Ayuda para sa Kapos ang Kita Program (AKAP) sa Department of Social Welfare and Development ug nalakip na kini sa Assistance to Individuals in Crisis Situation (AICS) program.
Diin ang AICS maoy gi-debatehan tali sa House of Representatives ug sa Senado atol sa bicam kay ang house leader daw niduso og AKAP ngadto sa DSWD nga wala masayod ang pipila ka mga senador.
Gidugangan usab ang budget sa Philippine National Police aron makatukod sila og 54 ka police stations sa nagkadaiyang local government units.
