CEBU – Patay ang usa ka 23-anyos nga motorcycle rider human nabanggaan sa fire hydrant sa national highway sa Barangay Cogon, dakbayan sa Bogo niadtong Biyernes, Mayo 27, 2022.
Gikatahong ni-overtake sa usa ka tanker truck ang biktima nga giilang si Jhon Pagubo Nuñez, construction worker nga taga Purok 1, Tagnonok, Barangay Salag, lungsod sa Tabogon, apan nahagbong hinuon kini sa fire hydrant human nawad-an og kontrol sa iyang motorsiklo.
Sumala sa Bogo Police Station, wala magsul-ob og helmet ang biktima hinungdan nga namatay kini diha-diha tungod sa impact.
Gidala pa kini sa labing duol nga tambalanan apan gideklarar nga patay sa nag-atiman nga doktor.
Gisuta pa sa kapolisan kon nakainom ba ang biktima atol sa hitabo, sanglit nitambong kini og kasaulogan sa fiesta sa dakbayan sa Bogo.
